Cusco, Peru 19.-30.08.2012

So, jetzt simmer scho 11 Täg in Cusco. Höchsti Zit, dass mer eu mal wieder updated.
Bi eusere Mama de Cusco fühlemer eus sehr wohl. s'Huus isch ungheizt wie anschiined alli da obe. Alles anderi wäri au en energetische Nonsens, es zieht dur alli Ritze und Löcher. Zum Glück hemmer 5 Deckene (devo 4 Alpaka-Wolldecke) und enand! De Tag dur a de Sonne ischs agnähmi 20 Grad warm, aber Znacht chüehlts uf bis zu 2 Grad ab, und das sobald d Sonne weg isch am ca. foifi.

De täglichi halbstündigi Weg zur Schuel uf 3400 Meter obe bringt eus au nach bald 2 Woche no guet usser Atem (Suurstoffmangel! Den chönds nüm stah ;-} ).
Ide Schuel gahts guet vorah, eifachi Gspröch chömmer bereits füehre. dSchuel selber isch chli, herzig und überschaubar und es het viel anderi easy Estudiantes ume. dJudith het e cooli Kollegin gfunde und mutiert mit ihre zäme zum Streber (Engl-Slang: Geek). Min Einzeluntericht isch sehr fordernd, aber er wird zwüschedine wieder ufglockered mit interessante Usflüg id Stadt (Museo Coca, Museo Artes Textil de los Inkas, Mercados Locales, Museo de Chocolate).

Am letschte Wuchenänd hemmer en Usflug is Sacred Valley unternoh. Es sehr fruchtbars Tal wo de Urubamba dureflüst, en Zuefluss vom Amazonas. Sit Jahrtusige wird da Landwirtschaft betriebe und dInkas hend da ihri berüehmte Terasse ad Häng agleit. In Pisac hemmer erfahre wie mer echts vo falschem Silber unterscheidet und sind di erste Inka-Ruine go aluege.

Nachemene Mittagshalt simmer witer nach Ollantaytambo wo witeri beidruckendi Zügniss us de vegangene Hochkultur zbestune gsi sind. Wahnsinnig die Astrengige wo vor Jahrhunderte unterna worde sind, zum die Festige id Berghäng zbaue. E gottgegebni Ufgab wo zum Teil mehreri Generatione lang duured het.
260km spöter simmer den wieder in Cusco acho.

Di folgende Täg hemmer den au dUswürkige vode berüchtigte und da wit verbreitete Travellerkrankheit (Durchfall, Mageverstimmig, Übelkeit, Müedigkeit etc.) "dörfe" erlebe, aber zum Glück nur am Rand gstreift und wenigi Täg spöter gahts eus scho wieder prächtig! :-) Alles i allem gahts eus bestens und mer freued eus uf witeri Abentüür.