Puno, Lake Titikaka, Islas de Uros 14./15.9.2012

Vo Cusco simer mitem Übernachtbus uf Puno gfahre. Sind am Morge am ca. 5 acho und vo de Reisegsellschaft abgholt worde. Mir zwoi händ denn im Büro vo de Reisegsellschaft oises Gepäck dörfe deponiere und uf de Sofas nochli pfuse.

Will ois all chli devo abgrohte händ do z viel Ziit und Geld z investere hämer nur en Halbtagestour bueched gha. Mir sind denn miteme Boot zu de schwümmende Strohinslene usegfahre. Händ dete erchlärt becho wie die gmacht sind und wie di Iiheimische dete läbed. D Souvenierständ sind scho ufbaut gsi…



Nach de churze Erlüüterige simer denn vo de einte „Familie“ id Hütte iglade worde. Die isch natürli au voll gsi mit Sache womer häd chönne chaufe. De Roman häd denn prompt au die armi Familie understützt.



 

 

S Gfühl zum uf sonere Strohinsle zsi isch no kuul gsi, es häd sich teilwis no lustig bewegt. Aber mir sind denn doch froh gsi, hämer würkli nur en Halbtagestour bueched gha.

Zrugg ufem Festland simer denn in Puno imene Resti go Ässe und händ vom Balkon us en super Usblick über de Hauptplatz gha. Dete isch nämli wieder Mal en Umzug gsi. Dasmal vo de verschiedene Universitäte. Spöter häds denn au no Gruppene us Cusco gha vomer erkennt händ.  

Btw.: Do mir nüm so viel in Peru wänd verbringe und d Ziit doch langsam knapp wird, hämer ois entschlosse, gwüssi Sehenswürdigkeite und Reiseabschnitt halt doch bimene Büro z bueche. Es häd also alles super klapped, d Lüüt sind überus fründlich, hilfsbereit und mir händ s Gfühl, mängisch wird’s au honoriert, dass mir (aso de Roman) spanisch chönd rede mit ihne…

Colibris und en Tiger...

Bereits in Cusco hämer oise ersti Colibri in freier Natur chönne beobachte. Eifach so währendem Käfele i eim vo oisne Stammplätzlis.

 

Spöter hämer au ufem Camino Inka chönne welche bi oisem Zeltplatz beobachte.

Uf de Strosse vo Nazca.

Und schlussendli hämer no eine in Nazca überfloge!!

Jez gömer denn no uf d Suechi nachem Tiger:)

Machu Picchu 9.9.-12.9.2012

Sorry, de Bricht wird chli länger, aber mir sind au viel gloffe, händ viel gseh und erläbt. No meh Details gits denn aber au gern uf Afrog wennmer wieder dehei sindJ

Am Sonntigmorge churz vor de sächsne simer miteme Büsli abgholt worde. Spöter sind zwoi jüngeri Amis und en (wie sich spöter usegstellt häd) Singapurnesin J dezuegstiege und spöter nomal es älters Ami-Päärli. Am Afang hämer dänkt, oh my godness, das git was…

Es sind denn aso au no d Träger dezue gstiege. Denn isches nach Ollantaytambo gange. Det hämer wieder en churze Stopp gha, händ en Mate de Coca chönne trinke und de Roman häd sich no mit Coca-Blätter ideckt. Dete hämer au oisi mitstriiter chli nöcher kenneglernt und händ gmerkt, mir händs glaub gar nöd so schlächt troffe. Si sind lässig und all zu sportlich sinds vermuetli au nöd, aso hämer en Chance, dassmer dene nohmöged…

Am Kilometer 82 isch denn de Start gsi. Dete hämer denn aso gmerkt, dass s Ami-Päärli und mir en Porter (Träger) für oises Gepäck gmietet gha händ. Nice! J De chliinsti Träger vo allne häd aso näbst de grosse Gasfläsche no anderi Sache i sin „Rucksack“ biige. De Roman hädem denn gholfe, das Teil azieh…

De ersti Tag isch eher „gemütlich“ gsi. Mir sind ca. 4,5 Stunde gloffe, 12 km und händ ca. 400 Höhemeter gschafft. Zwüschedure hämer denn di ersti Ruine vo wiitem chönne bestune und Erchlärige becho händ.

Womer am Zeltplatz acho sind händ Träger scho alles ufgstellt gha und s Essenszelt isch au parat gstande. Mir händ en Tee übercho und en chliine Snäck. Denn hämer all zäme chli Charte gspiilt (Bull-Shit für die wos kännedJ) bises z Nacht gäh häd. Scho bald simer denn go Pfuse. Obwohlmer viel Chleider in Schlofsack gstopfed händ, isches ziemli chalt gsi.

Tag 2 isch de asträngendsti gsi. Start uf 3‘000 m. ü. M., Tagwach am halbi Sächsi, zMorge am sächsi und am halbi sibni isches los gange. Oise Guide de Ramiro häd gmeint, mir sölled all oises eigne Tempo laufe, es gäb au kei „Sehenswürdigkeite“ underwägs, eifach di super Szenerie vo de Berge womer nöd sölled vergässe.

Gesagt, getan simer losgloffe. D Amis händ s Gfühl gha, die „erfahrene“ Schwiizer sölled doch vorus laufe und s Tempo agäh. Das hämer denn au gmacht. Langsam aber stetig. Nach ca. 1 Std. hämer denn en churze Stopp gmacht. Nachher isches 1,5 Std. wiiter gange bis zum nächste längere Stopp. Dete häds denn au wieder „Banos“ (WC’s) gäh. Für d Fraue isch das immer wieder es Abentüür gsi, wie gseht das Loch ächt us? Erkänntmer de Bode oder isch alles brun vor luuter „Erde“? Wie schmöckts so i de Nase? Etc… Mir händs aber all überläbt. Denn isch de Ufstiig wiiter gange, no ca. 450 Höhemeter, si säged, ca. 1:45 Std. De Roman und ich sind denn aso nach ca. 1 Std. dobe acho, d Amis ca. 10 Min. spöter und di letscht ca. 1 Std. spöter. Das isch de ersti grossi Pass uf 4'200 m.ü.M. gsi!!! De „Dead Woman’s Pass“. De Name chund do her, will d Bergchetti so usgseht.

De Usblick isch super gsi! Vorallem wennmer zrugg glueged häd, wasmer alles a eim Tag gschafft händ. Mir sind aso sehr stolz uf ois gsi!!

Wiiter isch denn ein 1,5 Std. Abstiig ufem Prgramm gstande. Au das hämer gschafft und sind denn bi oisem bereits wieder vorbereitete Zeltplatz (uf ca. 3‘700 m.ü.M.)  acho, händ en Saft übercho und wo all acho sind häds Zmittag gäh. De Zeltplatz isch uf so Terrassene platziert gsi und es Flüssli isch dra verbii gflosse. Es paar verruckti sind i dem iischalte Wasser go bädele. Denn hämer mal ca. 2 Std. für ois gha. Am ca. foifi häds wieder Tee und früsches Popcorn gäh. Nachher wieder Chartespiile (dasmal „Shithead“), Esse (d Crew isch ois no vorgstellt worde, vo 19 bis 53 isch alles vertrette gsi) und go Pfuse.

3. Tag isch wieder am Morge früeh Tagwach gsi, Zmörgele (dasmal händs no en Torte anezaubered) und wieder isches losgange.

Nach ca. 2 Std. hämer denn wieder en Inka-Ruine bestuunt und en chliini Füherig übercho. Wiiter isches denn anere Andere verbii gange gfolgt vomene wieder liechte ufstiig bismer bim Zmittagsplatz acho sind. Suppe, Esse, Dessert, denn no en Tee und wiiter isches gange. Mir händ wieder en rechte Ufstiig vor ois gha und 2 wiiteri Päss. Die händ ois denn in Regewald gfühert. Dobe acho, hämer wieder en churze WC-Stopp gmacht, wiiter Peruvien-Flat zunere andere Inka-Rune bevors denn mit über 2‘000 Stufene wieder abwärts gange isch.




Viel vom ganze Camino-Inka isch no uf Original-Weg-Steine us Inka-Ziite.

Die Stuufene sind dementsprechend au nöd irgendwie regelmässig oder suuber agortnet gsi. Es isch aber au wieder erstuunlich gsi, mit was für enere Liechtigkeit d Träger die Stuufene abe – fascht scho – tänzled sind.

Während all di andere de direkti Wäg zum Lager gnoh händ, sind mir no en anderi Ruine i de Nöchi go aluege. Jaja, nur 15 Peruvien-Minute meh, „just around de corner“… (siehe im Hindergrund)

Mir händs de aso gschafft und sind wieder miteme super Usblick belohnt worde. Nachher hämer ois aso müesse beeile, dassmer vorem Iidunkle no is Lager chömed. Hämer denn aber au gschafft. Nach Tee und Popcorn häds denn au scho wieder Znacht gäh. Zudem hämer ois vo de Träger verabschiedet (händ ine no ihres „vorgschriebne“ Trinkgäld gäh) und sind go pfuse.

Am letschte Tag isch denn am 3:30 Tagwach gsi! Pancake häds zum Zmorge gäh bevormer denn rasch händ müesse bim „Gate“ astoh. Nachere Stund warte isches denn am 5:30 s Gate ufgange. Di erste 300 Bsuecher händ denn dörfe dure goh. Nachere Stund hike simer denn am Sun-Gate acho. Dete hämer denn s erst Mal und vo ganz obe Machu Picchu erblickt. Mir händs gschafft! Händ di ganzi Asträngig überstande und sind mit dem atemberaubende Ablick belohnt worde. Machu Picchu i de ganze Pracht ibetted i die faszinierend Umgebig. Au hämer chli en Ahnig übercho, wie d Inkas gläbt händ, gloffe sind, wo Zwüschehalt gmacht händ und was Machu Picchu für en Bedütig für si gha häd.

 

Womer denn immer nöcher cho sind häd denn, nach 4 Täg Rueh und fascht scho Isolation, de Touri-Stress wieder chli agfange. Wo isch s beschte Plätzli zum es Foti mache, wer stoht im Wäg umenande, wer schwätze wie luut etc. Mir händ denn aber trotzdem no di ganzi Füherig mitem Ramiro gmacht und händ d Hinterlasseschafte vo de Inkas nomal uf ois iiwürke loh.

Denn isches aber scho sehr bald Ziit gsi zum wieder zrugg id Zivilisation zgah. Oisi ganzi Gruppe häd s gliiche Bedürfnis gha. Bim Usgang hämer denn no chönne en Stämpfel in Pass mache loh. Am Afang vom Trail hämer scho eine übercho, und do jez no en Zwoite. Au no speziell in Pass! Denn simer ab is Dörfli Aquas Calientes. D Männer händ es Bier welle und d Fraue wiedermal es „richtigs“ WC J. Im Resti hämer denn es Zertifikat übercho und händ i de Gruppe die letschte 4 zwar asträngende aber au überus faszinierende Täg mit de viele Iidrück revue passiere loh. dAstrengig het sich definitiv glohnt!

 

Cusco, Peru, 31.8.-8.9.2012

Eusi 3 Wuche Spanischschuel sind bereits fertig sitem 7.Sept, dZit isch recht grast! Mer hend dStadt recht guet kenneglernt und wüssed jetzt einigi anderi Plätz wos guete Kafi git und ned nur sübertüürete Starbucks. Hankerum sind eus gwüssi Sache den au chli ufd dNerve gange... S ewige Hupkonzert vode Autos (vorallem Taxis) ide verstopfte Strasse zum Bispil. Am Wuchenänd vom 1.+2.Sept. hemmer na es paar Sehenswürdigkeite ide Umgebig vo Cusco aglueget. Am Samstig simmer ines Colectivo (Chlibus für di lokal Bevölkerig und muetigi Travellers) igstige (dJudith het im Gang ufemene Farbkübel Platz gfunde) und hend eus 11km vo Cusco entfernt bi zwei Inka Ruine userüere lah. Tambomachay isch e alts Inkabad und Pukapukara, grad ide nächi, isch es Hostel gsi für Reisendi ide alte Ziite. Vo deht her hend mir eus uf dWanderig zrugg in Richtig Cuscu gmacht, nach 3Std simmer den in Sacsaywamán (oder "sexy woman" wies eifachheitshalber fürd Touris au gnennt wird) acho. Dä ehemalig Regierigssitz isch es beidruckends Meisterwerk vo Inka-Ingenieurskunst und trohnt höch über de Dächer vode einstige Imperiumshauptstadt Cusco (bedütet ide alte Quechua-Sproch: Nabel der Welt und het scho vor 400Jahr 2Millione Iwohner gha). Di riesige, tonnenschwere Steiblöck sind fiinstens bearbeitet und au Jahrhunderte spöter mag na keis Blatt Papier zwüschedine. Leider hend dSpanier de Grossteil vode Bauwerk zerstört. Am Sunntig hemmer eus es Taxi füre Rundfahrt chartered. Als ersts sind dRuine vo Moray ufem Program gstande. Mehreri Senkene ide Landschaft wo dank de Terassebaukunst und de damit verbundene unterschiedliche Mikroklimas in alter Zit vermuetli zur Forschig vo Agrokultur/Pflanzeabau agleit worde sind. Nachher isches witer gange zude "Salinas de Maras". En wunderbare Ablick wemmer i das Tal inefahrt und gseht wie sich hunderti vo wiise Terasse an Hang hereschmieged. Sit hunderte vo Jahre und bis hüt wird da Salz abbaut.

Uf de Rückfahrt het den de Taxifahrer anere Krüzig aghalt und gfunde vo da bis zrugg nach Cusco chönemer de Bus neh. Da das ganz klar ned dAbmachig gsi isch hemmerem en Ateil vom usghandlete Priis id Hand druckt, woruf er eus mit spanische Usdrück beglückt het, wo mer ide Schuel definitiv ned lernt! ;-) Nachdem mir aber druff bestande hend, dass er alles Geld erst bechunnt, wenn er eus ganz zrugg fahrt, het er eus (begleitet von witere sprachliche Kraftusdrück) den doch uf Cusco gfahre. Di letscht Wuche in Cusco hemmer den viel Zit mit lerne und mit eusne Schuelkollege verbrocht. Hends den au na gschafft di peruanisch Nationalspiis "Cuy" (Meerschweindli) go zesse. Isch also gar nüt speziells! Am letschte Fritig simmer nach de Schuel an Plaza de Armas gloffe, wo zu eusem erstune es Renne mit tuunte Autos stattgfunde het. Ohni Sicherheitsabsperrige oder -Personal sind die Driver um Kurve vom Hauptplatz gslidet! A eusem letschte Samstig ide Stadt hemmer na es grosses Volksfest zu ehre vonnere Stadtheilige dörfe erlebe. Dutzendi vo Gruppe sind tanzend und musizierend dur Cusco zoge. En riesige und farbige Karnevalumzug.. bloss im Verglich zu dene Stassemusige chönnt eusi Fasnachtsguggene grad würkli hervorragend spiele! :-)