De Flug uf Lima, Peru isch leider nöd so agnähm gsi. Aber mir händs überstande. D Ussicht über Key West isch deför super gsi, hämer das also au no gsehJ
Mir händ für 1 Nacht in Lima es Hotel gha i de „Nöchi“ vom Flughafe willmer am Morge „frühe“ wieder wiiter gfloge sind. Nachdem oises Gepäck acho isch (mir händ müesse feststelle, dass das aso alles andere als normal isch. Sone langi Schlange hani glaubs no nie gseh bi Lost-Luggages) hämer ois verusse welle en Überblick schaffe, womer ane müend. All die liebenswürdige Taxifahrer vo de Umgäbig händ ois natürli welle helfe. ABER mir händ oises Hotel zimli glii gseh, es isch nämli grad über d Stross gsi, aso würkli eifach über de Fuessgängerstreiffe und ab id Lobby! Isch super gsi. Zur Begrüessig häds denn en Pisco Sour gäh (Peruanisches Nationalgetränk mit ufgschlagnem Eiwiis). Wenns nöd gratis gsi wär hättets nöd beid vo ois probiertJ
Guet, denn isch plötzli no d Frog im Zimmer uftaucht, was hämer eigentlich für Ziit? D Uhr am Wecker im Hotel zeigt en anderi Ziit ah als d Weltuhr im Internet. Aber s Internet isch doch sicher verlässlicher. DÄNKSTE! Am nächste Morge simer denn grad nochli in Stress cho am Flughafe womer gmerkt händ, dass d Ziit ufem Wecker mit dere am Flughafe überiigstumme häd und mir drum en Stund zspoht dra gsi sind. (Für all die wo sich jez Froged, wer vo ois denn im Internet so falsch glueged häd: es sind beidi unabhängig vonenand gsi!!) Uf all Fäll hämer ois dur de Usgang dur zum erste Platz vom Check-In duregmogled und sind wieder guet im Ziitplan inne gsi und händ de Flüger no läschär verwütscht.
Lg Judith & Roman
Keine Kommentare:
Kommentar veröffentlichen